بنگلورو، 15/ جولائی (ایس او نیوز/ایجنسی) کرناٹک کے چیف الیکٹورل آفیسر کے دفتر کی جانب سے منگل کی شام 6:00 بجے جاری کردہ یومیہ پریس نوٹ کے مطابق ریاست میں خصوصی نظرِ ثانی مہم کے تحت ووٹر فہرستوں کی گھر گھر جانچ اور اندراجی فارموں کی تقسیم کا عمل تیزی سے جاری ہے۔

پریس نوٹ کے مطابق 16 جون 2026 تک ریاست میں رجسٹرڈ رائے دہندگان کی مجموعی تعداد 5,54,32,314 ہے۔ گھر گھر سروے اور اندراجی فارموں کی تقسیم کا عمل 30 جون سے 29 جولائی 2026 تک جاری رہے گا، جبکہ فارموں کے ڈیجیٹل اندراج کی کارروائی بھی اسی مدت کے دوران انجام دی جا رہی ہے۔

اعداد و شمار کے مطابق اب تک 52,715,809 اندراجی فارم تقسیم کیے جا چکے ہیں، جو مجموعی ہدف کا 95.10 فیصد ہے۔ ریاست کے 42,834 پولنگ مراکز میں فارموں کی تقسیم کا عمل 100 فیصد مکمل ہو چکا ہے، جبکہ 8,216 پولنگ مراکز میں 90 فیصد سے زائد فارم تقسیم کیے جا چکے ہیں۔

ڈیجیٹل اندراج کے مرحلے میں اب تک 19,951,636 فارموں کا اندراج مکمل کیا گیا ہے، جو مجموعی فارموں کا 35.99 فیصد بنتا ہے۔ اس کے علاوہ 221,814 ووٹروں نے اپنے اندراجی فارم آن لائن جمع کرائے ہیں۔

پریس نوٹ میں بتایا گیا ہے کہ جانچ کے دوران 319,822 ایسے ووٹروں کی نشاندہی ہوئی ہے جن کا انتقال ہو چکا ہے، جبکہ 679,906 ووٹر مستقل طور پر دوسرے مقامات پر منتقل ہو چکے ہیں۔ اسی طرح 127,516 ووٹر اپنے درج شدہ پتوں پر موجود نہیں پائے گئے، 58,602 افراد پہلے ہی ووٹر فہرست میں شامل تھے، جبکہ 3,679 معاملات دیگر زمروں میں درج کیے گئے ہیں۔

چیف الیکٹورل آفیسر کے دفتر نے تمام اہل شہریوں سے اپیل کی ہے کہ وہ گھر گھر نظرِ ثانی مہم کے دوران انتخابی عملے سے تعاون کریں، اندراجی فارم بروقت جمع کرائیں اور ووٹر فہرست میں اپنی معلومات کی درستگی کو یقینی بنائیں تاکہ کوئی بھی اہل شہری اپنے حقِ رائے دہی سے محروم نہ رہے۔