بنگلورو، 13/ جولائی (ایس او نیوز/ایجنسی) کرناٹک کے چیف الیکٹورل آفیسر کے دفتر کی جانب سے اتوار کی شام 6:00 بجے جاری کردہ یومیہ پریس نوٹ کے مطابق ریاست میں خصوصی انتخابی نظرِ ثانی (ایس آئی آر) مہم کے تحت ووٹر اندراج فارموں کی تقسیم اور ڈیجیٹل اندراج کا عمل تیزی سے جاری ہے۔

پریس نوٹ کے مطابق 16 جون 2026 تک ریاست میں رجسٹرڈ ووٹروں کی مجموعی تعداد 5,54,32,314 ہے۔ تمام اندراجی فارم چھاپ کر بوتھ سطحی افسران کے حوالے کیے جا چکے ہیں۔

جاری اعداد و شمار کے مطابق اب تک 51,521,624 اندراجی فارم تقسیم کیے جا چکے ہیں، جو مجموعی ہدف کا 92.99 فیصد ہے۔ ریاست کے 37,707 پولنگ مراکز میں فارموں کی سو فیصد تقسیم مکمل ہو چکی ہے، جبکہ 10,688 پولنگ مراکز میں نوّے فیصد سے زیادہ تقسیم کا مرحلہ مکمل کیا جا چکا ہے۔

ڈیجیٹل اندراج کے عمل میں بھی نمایاں پیش رفت ہوئی ہے۔ اب تک 14,481,783 فارم آن لائن درج کیے جا چکے ہیں، جو مجموعی فارموں کا 26.13 فیصد بنتا ہے۔ 16 پولنگ مراکز میں تمام فارموں کا سو فیصد ڈیجیٹل اندراج مکمل ہو چکا ہے، جبکہ 611 پولنگ مراکز میں نوّے فیصد سے زیادہ فارموں کی ڈیجیٹل تکمیل ہو گئی ہے۔

اسی دوران ووٹروں کی جانب سے 228,842 فارم براہِ راست آن لائن جمع کرائے گئے ہیں، جو مجموعی فارموں کا تقریباً 0.4 فیصد ہے۔

نظرِ ثانی کے دوران 738,118 ووٹروں کو ایک سے زیادہ اندراج یا دیگر جانچ کے لیے نشان زد کیا گیا ہے، جبکہ 79,146 ووٹر ناقابلِ رسائی یا غیر حاضر پائے گئے۔

اس کے علاوہ 415,614 ووٹر مستقل طور پر دوسری جگہ منتقل ہو چکے ہیں، 206,206 ووٹروں کے انتقال کی تصدیق ہوئی ہے، 35,838 افراد پہلے ہی ووٹر فہرست میں درج پائے گئے، جبکہ 2,314 معاملات دیگر زمروں میں شامل کیے گئے ہیں۔

چیف الیکٹورل آفیسر کے دفتر نے ضلع وار فارموں کی تقسیم اور ڈیجیٹل اندراج کی تازہ ترین تفصیلات بھی جاری کرتے ہوئے متعلقہ افسران کو مقررہ مدت کے اندر خصوصی نظرِ ثانی کا عمل مکمل کرنے کی ہدایت دی ہے۔