کولکاتہ ، 9/ جولائی (ایس او نیوز/ایجنسی) ممتا بنرجی کے احتجاجی مارچ کے دوران زبردست ہنگامہ ہوا۔ احتجاج کے دوران سابق وزیر اعلیٰ کا احتجاج پر غصہ دیکھاگیا ہے۔وہ ایک شخص کو تھپڑ مارتی ہوئی نظر آتی ہیں، جس کے بارے میں خیال کیا جاتا ہے کہ وہ ترنمول کانگریس کا کارکن ہے۔

میڈیا رپورٹس کے مطابق وائرل ویڈیو کالی گھاٹ میں ممتا بنرجی کے گھر کے باہر کا ہے۔ بدھ کو، ممتا بنرجی نے ایک 11 سالہ لڑکی کی عصمت دری اور قتل کے خلاف احتجاج کے لیے بروئی پور میں ایک ریلی نکالی۔ بی جے پی اور ٹی ایم سی کارکنوں کے درمیان جھڑپیں ہوئیں، دونوں جماعتوں کے درمیان بڑھتی ہوئی بدامنی کو روکنے کے لیے پولیس کو مداخلت کرنے پر مجبور کرنا پڑا۔ بنرجی نے الزام لگایا کہ بی جے پی کے حامیوں نے ریلی میں خلل ڈالا اور راستے میں کئی مقامات پر ترنمول کانگریس کے کارکنوں پر حملہ کیا۔

انہوں نے کہا، "ہائی کورٹ نے ہماری ریلی کی اجازت دی تھی، لیکن بی جے پی کے غنڈوں نے اسے روک دیا، پولیس ریلی کی اجازت دینے والے عدالتی حکم کو کیسے نظر انداز کر سکتی ہے؟ بی جے پی کے غنڈے ہمارے پارٹی کارکنوں کو مارتے ہیں۔ کیا یہ جمہوریت ہے؟"

بنرجی نے الزام لگایا کہ پولیس غیر جانبداری سے اپنے فرائض ادا کرنے میں ناکام رہی ہے اور یہ فورس "بی جے پی تنظیم کی شاخ" بن گئی ہے۔ انہوں نے کہا، "پولیس عوام کو تحفظ فراہم کرنے سے قاصر ہے اور ہمارے پروگرام میں خلل ڈالنے کے لیے استعمال ہو رہی ہے۔" ترنمول کانگریس سربراہ نے یہ بھی الزام لگایا کہ وہ مسلسل نگرانی میں ہیں۔ انہوں نے کہا، 'مجھے پولیس کی نگرانی میں ایسے رکھا گیا ہے جیسے میں گھر میں نظر بند ہوں۔'